وعلاء وجمال .. بره القفص من غير كلابشات وكف على الكاميرا وجوه القفص كف على كف والحياة بيييس وبيحيوا كلابهم السعرانه اللى بتهتف ليهم بعد الجلسه ومفكرين نفسهم فى ماتش مصر والكاميرون فى الاستاد
والعادلى .. فى كل جلسه غاسل سنانه وبيضحك اكتر من الضحك اللى شوفناه بيضحكه فى الـ 14 سنه اللى ربنا ابتلانا فيهم بيه
ونظيف .. ما شاء الله ماشيه معاه زى السكينه فى الجاتوه مش الحلاوه اللى ما كلهاش وشكله مش هياكلها بيطلع من الحكم مع إيقاف التنفيذ يخش فى إخلاء السبيل من النيابة العسكرية
ورشيد محمد رشيد ويوسف بطرس غالى .. ما شاء الله عليهم حسن ومرقص يا اخواتى!!!! وفتشنى فتش خش فى عبى خش ... وأمنا فى العش وللا طارت؟؟؟؟؟
وحسين سالم .. أسبانيا وخلاص طمعت فيه واحتمال يبقى خليفة جوارديولا فى تدريب برشلونه
وزكريا عزمى .. والأمن الخاص بتاعه ساب كلاب حراسة فيلته على بتوع الكسب غير المشروع
وباقى رموز الفساد .. ومحاكماتهم بتتأجل أكتر من ماتشات الأهلى فى الدورى لما بيلعب فى كاس أفريقيا
ومرتضى منصور .. بعد أقل من شهر عنده محكمة هوه وابنه وابن اخته بتهمة القتل والشروع فى القتل فى موقعة الجمل اللى سماها هوه موقعة المعزه وداير يلف على القنوات يقول أنا رئيس مصر الجاى وافهموها بقى دى انتفاضه مش ثورة وطبعا مش مبطل شتيمه فى خلق الله حتى عصام شرف ما سلمش من لسانه لما قال عليه انه ماينفعش رئيس حى العجوزة مش رئيس وزراء
وعمرو مصطفى .. وخلانا نمشى نكلم نفسنا ونقاطع بيبسى وفودافون علشان ولا نتكلم ولا نشرب وكمان نبطل نقول كلمة نريد علشان دى كلمة اليهود لما بيطلعوا يتكلموا فى قناة الجزيرة
والتحرير .. وبقى معسكر أمن مركزى من بره ومركز تدريب الشرطة العسكرية من جوه
ومصطفى محمود .. بقى أول خط اتوبيسات أنا آسف يا ريس للأكاديمية
وانا آسف ياريس .. وبياكلوا الأخضر واليابس عند الأكاديمية ومش مالى عينهم التعزيزات الأمنية غير المسبوقة فى تاريخ البشرية ونازلين ضرب فى أى حد ما بيلطمش على اللى رايحين يتأسفوا ليه حتى قنوات التليفزيون ماسلمتش من أذاهم
ورجالة الحزب الوطنى .. ورانا ورانا إما يشكلوا حزب جديد أو ينضموا على أحزاب موجوده وهينزلوا الانتخابات وناسيين حاجه مهمه جدا وهيه إن اللى عنده دم احسن من اللى عنده عذبه
والشوارع .. ومليانه بلطجية فى الرايحة والجاية بيدحرجوا التماسى على اخواتنا أمناء الشرطة اللى بطلوا يقفوا خلاص فى الشوارع علشان السبوبة وقفت
والسلفيين .. ووسعت منهم أوى وعايزين يعلنوا استقلال سيناء وإقامة أول إمارة إسلامية فى تاريخ المجرة الكونية رغم ان ناس كتير مش عارفه تاريخ ميلاد السلفيين كان إمتى بالظبط؟؟؟؟؟
وأسماء محفوظ .. وكفالتها ضعف كفالة عائشه عبد الهادى طبعا علشان دى بلد بتاعة شهادات زى ما قال عادل إمام مش كده وبس لأ دى تانى يوم لبست محكمة عسكرية بعد ما لقيوا بطارية صواريخ باتريوت أمريكية الصنع فى بير السلم بتاع بيتها
وبعد ده كله تلاقى واحد قاعد مجعوص ومش عايش عيشة أهله يقوللك بمنتهى البجاحه : هوه العيال بتوع الثـورة عايزين إيه؟؟؟
ردوا انتوا بقى عليه علشان انا خلاص مفرهد من اللى كتبته وماليش نفس اشتم
إقعدوا بالعافيه
